Category Archives: مجتمع

واد الشّراط

شي مرّات شي تفاصيل تافهة كانبقى عاقل عليها، ما كايصلاحو لوالو، حتى شي نهار كايديرو فراسك واحد التسرسيرة. قبيلة مع الخبار ديال الموت ديال وزير الدّولة باها، الله يرحمو، بان ليّ هاد النشر ديال الصديق مروان المحرزي العلوي ففايسبوك، مروان اللّي عزيز عليه يبين تفاهة صحاب نظرية المؤامرة، و أنا معاه، عندو واحد السلسة شيّقة ديال الڤيديوات على بعض الصدف اللّي يقدر الواحد يبني منهم نظريات للمؤامرة.
مروان نشر صورة توضيحية لمكان وفاة باها و مكان وفاة البرلماني الزايدي شهر قبل منّو، القصة الحالية هي أنّ باها توفى بعدما مشى يشوف البلاصة اللّي مات فيها الزايدي.

الصورة موخودة من عند مروان و كايبانو فيها مكان وفاة الزايدي و مكان وفاة باها شهر من بعد

الصورة موخودة من عند مروان و كايبانو فيها مكان وفاة الزايدي و مكان وفاة باها شهر من بعد، مروان كيعلّق على الصدفة و كايگول بلّي هاد الشي يلا كتبتيه فقصة خياليّة يگولو ليك النقّاد زدتي فيه

بن بركة مهرّس من عنقو ورى الحادثة ديال واد شرّاط

من بعد ما شفت هاد النشر وانا نتفكّر واحد القصة قديمة كنت عارفها على بن بركة، اللّي تاهو وقعات ليه حادثة سير فالقنطرة ديال الطريق اللّي فوق واد شرّاط، يعني حدى القنطرة ديال التران شوية، فشهر حضاش ديال عام ألف و تسعمية و ثنين و ستّين. الحادثة ديال بن بركة، ماشي ديال الزايدي و باها، باش نكونو متفاهمين، كانت مدبّرة من طرف الدليمي و أفقير، تهرّس فيها من عنقو و لبس على إثرها بن بركة الجبّارة ديال العنق (minerve)، كيف ما كنشوفو فالتصويرة، و فالمقطع ديال الڤيديو لتحتاني.

الموهيم، هادشي كلّو صدفة  للأنني ما كانآمنش بنظرية المؤامرة. فبلاد فيها 3000 قتيل فالعام غير فحوادث السير، الاحتمال ديال وقوع الصدف و الاحتمال باش جوج دالنّاس يموتو فنفس البلاصة كبير.
بالنسبة للفيديو، خاص النقر جوج مرّات على البوطونة ديال پلاي باش يمشي نيشان للّقطة اللي كاتشرح محاولة اغتيال بن بركة فواد الشرّاط و اللّي تفكرتها ورى النشر ديال مروان.
واد الشرّاط - الصورة من الوثائقي المعادلة المغربية، عن حياة بن بركة

واد الشرّاط – الصورة من الوثائقي المعادلة المغربية، عن حياة بن بركة