Category Archives: Economy

مياة درهم للناس اللي جاهم الفيضان

هادي واقيلة أول حملة ديال جمع التبرعات بالأداء الإلكتروني اللي غاديا تنجح فالأنترنت المغربي، بعد الفياضانات اللي وقعات فالوسط الغربي ديال المغرب (ماشي الجنوب، الجنوب باقي ليه واحد ألف كيلوميتر لتحث 😉 ) و خاصة نواحي گليميم و تيزنيت، ناضو شي وحدين من مستعملين تويتر و دارو حملة ديال التبرعات فبلاصت ما يبقاو يبارطاجيو التصاور ديال الناس كاتغرق. فظرف أقل من ربعة و عشرين ساعة وصلات دابا لكثر من ستين ألف درهم من عند مواطنين، و خمسة و ربعين ألف درهم من عند ميديتيل.guelmim

الناس اللي واقفين على جمع التبرعات ناس مضمونين، التبرعات كايمشيو للبنك الغذائي المغربي اللّي أكدّ المباركة ديالو لهاد الطريقة للتبرع فالصفحة الرسمية ديالو ففايسبوك، و الخلاص بالبطاقة حتى هو مضمون، كانت مغربية و لا ديال الخارج.

الرابط ديال الحملة هو هذا

http://www.cotizi.com/pool/100dhpouraider/226

و بالنسبة للناس اللّْي بغاو يتبرعو مبارشرة عند البنك الغذائي المغربي، المعلومات كاينة فالموقع الرسمي ديالو فهاد الرابط، بطبيعة الحال بالنسبة للناس اللي فالخارج الخلاص بالبطاقة حسن حيث فيه مصاريف بنكية قليلة

http://www.banquealimentaire.ma/aide.asp

ملاحظة، القانون المغربي كايفرض على كل واحد بغا يجمع التبرعات ياخد رخصة من عند الكتابة العامة للحكومة، و حنا هنايا قدّام حالة جديدة كتبيّن كيفاش أن القوانين الحالية ما موالماش السرعة و انعدام البيروقراطية اللّي كايحتاجها زمان الأنترنت

فنفس الوقت مؤسسات رسمية بحال البريتيش كونسيل اللي عندها مع سرعة المواكبة بدات كاتساند الحملة فالشبكات الاجتماعية و هادي قضية مزيانة

تحديث: الحساب الرسمي ديال السفارة المغربية فالنگليز حتى هو نشر النداء، و هو أول مؤسسة ديال الدولة كاتنشر الندائ و هادي قضية مزيانة، نقدرو نتسائلو واش حيت شاف البريتيش كونسيل دارها، و لكن حسن نركزو دابا على التبرعات